நாட்பட்ட தொற்றா நோய்கள்: இலங்கை எதிர்கொள்ளும் சுகாதார நெருக்கடி (Chronic Non-Communicable Diseases ) - தொடர் 1

DR MBM SILMY (MBBS).

MOIC - PMCU CHENAIKUDIYIRUPPU

தொற்றா நோய்கள்: ஓர் அறிமுகம் (Non-Communicable Diseases - NCDs)

தொற்றா நோய்கள் (Non-Communicable Diseases - NCDs) என்பவை தொற்று மூலம் பரவாத நோய்களாகும்.

தொற்றா நோய்களை இரண்டு வகையாக பிரிக்கலாம்:

திடீர் தொற்றா நோய்கள் (Acute NCDs): இவை திடீரென ஏற்படும் காயங்கள் மற்றும் சாலை விபத்துக்கள் (Road Traffic Accidents - RTA) காரணமாக ஏற்படுகின்றன.

நீண்டகால/நாட்பட்ட தொற்றா நோய்கள் (Chronic NCDs): இவை நீண்ட காலம் நீடிக்கும் நோய்களாகும். நீரிழிவு நோய் (Diabetes Mellitus - DM), உயர் இரத்த அழுத்தம் (Hypertension - HTN), இரத்தத்தில் கொழுப்பு அதிகரித்தல் (Dyslipidemia), நாட்பட்ட சிறுநீரக நோய் (Chronic Kidney Disease - CKD), இதய நோய்கள் (Ischemic Heart Disease - IHD, Cardiovascular Disease - CVD), புற்றுநோய்கள் (Cancer) மற்றும் நாட்பட்ட சுவாச நோய்கள் (Chronic Respiratory Diseases - CRD) போன்றவை இதில் அடங்கும்.

இவை தவிர, கண் நோய்கள், காது கேளாமை, நாட்பட்ட ஈரல் நோய்கள், மற்றும் நரம்பியல் கோளாறுகள் போன்றவையும் நாட்பட்ட தொற்றா நோய்களில் அடங்கும்.

உலக சுகாதார ஸ்தாபனத்தின் (World Health Organization) கூற்றுப்படி, நாட்பட்ட தொற்றா நோய்கள் (Chronic Non-Communicable Diseases - NCDs) உலகளவில் ஏற்படும் இறப்புகளில் 74% காரணமாகின்றன. இதில் கவனிக்கத்தக்க விஷயம் என்னவென்றால், இந்த இறப்புகளில் முக்கால்வாசிக்கு மேல் மற்றும் அகால மரணமடையும் 86% மக்கள் குறைந்த மற்றும் நடுத்தர வருமானம் உள்ள நாடுகளில் வசிக்கிறார்கள். புகையிலை பயன்பாடு (tobacco use), உடல் உழைப்பின்மை (physical inactivity), மது அருந்துதல் (harmful use of alcohol), ஆரோக்கியமற்ற உணவு பழக்கம் (unhealthy diets) மற்றும் காற்று மாசுபாடு (air pollution) ஆகியவையே நாட்பட்ட தொற்றா நோய்கள் ஏற்படுவதற்கான ஐந்து முக்கிய காரணிகள் ஆகும்.

இலங்கை தற்காலத்தில் எதிர்கொள்ளும் சவால்களான தொற்று நோயியல் (epidemiology), சனத்தொகை (demographic), சமூக பொருளாதாரம் (socio economic) மற்றும் சுற்றாடல் மாற்றங்கள் ஆகியவை பொதுச் சுகாதாரம் சம்பந்தமான நிலப்பரப்பு வேறுபாடுகளுக்குக் காரணமாக அமைகின்றன. தற்காலத்தில் எட்டில் ஓர் இலங்கையர்கள் 60 வயது மற்றும் அதற்கும் மேற்பட்டவர்களாக உள்ளதோடு 2041 ஆம் ஆண்டளவில் இவ்விகிதாசாரம் இருமடங்காகும் என எதிர்பார்க்கப்படுகின்றது. வயது அதிகரிக்கும் போது தொற்றா நோய்களினால் பாதிக்கப்படும் தன்மை அதிகரித்துச் செல்கிறது. விரையான நகரமயமாக்கம் (urbanization), உலக மயமாக்கல் (globalization), வர்த்தக தாராள மயமாக்கல் (trade liberalization) மற்றும் சனத்தொகை இடமாற்றங்கள் போன்றவை மக்கள் ஆரோக்கியமற்ற வாழ்க்கை முறையை பின்பற்றுவதற்கு பல வழிகளில் பங்களித்துள்ளன. அத்துடன், தற்காலத்தில் காணப்படுகின்ற சூழலியல் மாற்றங்கள் நாட்பட்ட தொற்றா நோய்கள் தொடர்பான ஆபத்தானது சகல மக்கள் குழுக்களிலும் அதிகரித்துக் காணப்படக் காரணமாகின்றன.

இலங்கையில் நாட்பட்ட தொற்றா நோய்களின் நிலை

உள்நாட்டு நோயுற்ற தன்மை மற்றும் இறப்பு அறிக்கை (Indoor Morbidity and Mortality Return - IMMR) தரவுகளின்படி, இலங்கையில் அரசாங்க மருத்துவமனைகளில் ஏற்பட்ட மொத்த இறப்புகளில் ஏறத்தாழ 50 சதவீதம் இருதய நோய் (cardiovascular disease), புற்றுநோய் (cancer), நாட்பட்ட சுவாச நோய்கள் (chronic respiratory diseases), மற்றும் நீரிழிவு நோய் (diabetes mellitus) போன்ற நாட்பட்ட தொற்றா நோய்களால் ஏற்பட்டவை. 2023 ஆம் ஆண்டில், குருதியோட்ட குறை இதய நோயால் (ischemic heart disease) 12.6 சதவீதமும், புற்றுநோயால் 8.6 சதவீதமும், சுவாச நோய்களால் 11.5 சதவீதமும், மூளை இரத்தக்குழாய் நோயால் (Cerebro-vascular disease) 6.8 சதவீதமும், உயர் இரத்த அழுத்த நோயால் 0.9 சதவீதமும், மற்றும் நீரிழிவு நோயால் 0.8 சதவீத இறப்புகள் நிகழ்ந்துள்ளன.

2015 ஆம் ஆண்டில் 18-69 வயதுடைய 5188 பேரிடம் நடத்தப்பட்ட STEPS ஆய்வின்படி, 40-69 வயதுடைய இலங்கையர்களில் 9.1% பேருக்கு அடுத்த 10 ஆண்டுகளில் இதய நோய் வருவதற்கான ஆபத்து 30% அல்லது அதற்கும் அதிகமாக உள்ளது. இந்த ஆய்வின்படி, நான்கில் ஒரு இலங்கையர் உயர் இரத்த அழுத்தம் அல்லது அதற்கான மருந்துகளை உட்கொள்பவர்களாக உள்ளனர். கிட்டத்தட்ட நான்கில் ஒருவர் உயர் மொத்த கொலஸ்ட்ரால் (>190 mg/dL) அல்லது அதற்கான மருந்துகளை உட்கொள்பவர்களாக உள்ளனர். மேலும், 7.4% பேர் உயர் இரத்த சர்க்கரை அளவு கொண்டவர்களாக அல்லது அதற்கான மருந்துகளை உட்கொள்பவர்களாக உள்ளனர். தொற்றா நோய்களுக்குரிய ஆபத்துக் காரணிகளை மாற்றத் தக்க காரணிகள் (modifiable risk factors), மாற்றமுடியாத காரணிகள் (non-modifiable risk factors) என வகைப்படுத்தலாம். மாற்ற முடியாத காரணிகளுள் வயது, பால், இனம், குடும்ப வரலாறு போன்றன அமைவதுடன், மாற்றத்தக்க காரணிகளுள் புகைத்தல், மதுபான பாவனை, ஆரோக்கியமற்ற உணவுப் பழக்கவழக்கங்கள், உடல் இயக்கமின்மை மற்றும் மன அழுத்தங்கள் போன்றன பிரதான காரணிகளாக அமைகின்றன.

ஆரோக்கிய வாழ்வு நிலையங்கள் (Healthy Lifestyle Centers - HLCs)

இலங்கையில் அதிகரித்து வரும் நாட்பட்ட தொற்றா நோய்களை கட்டுப்படுத்தும் நோக்கில், சுகாதார அமைச்சினால் 2011 ஆம் ஆண்டு ஆரோக்கிய வாழ்வு நிலையங்கள் (Healthy Lifestyle Centers) ஆரம்பிக்கப்பட்டன. இதன் முக்கிய நோக்கம், ஆரம்ப சுகாதார நிலையங்கள் மூலம் 35 வயதுக்கு மேற்பட்டவர்களுக்கு நாட்பட்ட தொற்றா நோய்களுக்கான ஆபத்து காரணிகளை ஆரம்பத்திலேயே கண்டறிந்து, இருதய நோய் (Cardio Vascular Disease - CVD) அபாயம் உள்ளவர்களுக்கு சிறப்பான சிகிச்சை அளிப்பதை உறுதி செய்வதாகும். ஆரோக்கிய வாழ்வு நிலையங்களில், நோயாளிகளின் இருதய நோய் அபாயத்தை மதிப்பிடுவதற்கு உலக சுகாதார அமைப்பு/சர்வதேச உயர் இரத்த அழுத்த சங்கம் (World Health Organization/International Society of Hypertension) பரிந்துரைத்த முறையைப் பயன்படுத்தி, அவர்களுக்கு தேவையான ஆலோசனைகள் மற்றும் சிகிச்சைகள் வழங்கப்படுகின்றன.

ஆரோக்கிய வாழ்வு நிலையங்களில் சோதனைக்கு உட்படுத்தப்படுவதற்கு தகுதியான நபர்களுக்கான 2 பிரிவுகள் பின்வருமாறு:

பிரிவு A: 35 வயது அல்லது அதற்கு மேற்பட்ட நபர்கள், குருதி சுற்றோட்ட தொகுதி தொடர்பான நோய்கள் (இருதய நோய், பக்கவாதம், உயர்குருதி அழுத்தம்), நீரிழிவு நோய், புற்று நோய், நாட்பட்ட சிறுநீரக நோய், நாட்பட்ட கல்லீரல் நோய், குருதியில் உள்ள கொழுப்பின் அளவின் ஏற்றத்தாழ்வுகள் போன்ற நோய் நிலைமைகள் அற்ற நபர்கள்.
பிரிவு B: 20-34 வயதுக்குட்பட்ட நபர்கள், ஆனால் கீழே குறிப்பிடப்பட்டுள்ள ஏதேனும் ஆபத்தான காரணிகளை கொண்ட நபர்கள்

கடந்த ஒரு வருடத்தில் புகையிலை புகைக்கும் பழக்கமுள்ளவர்கள்.
அதிக எடை (உடல் நிறை குறியீட்டெண் ≥25 kg/m2) நிலை உள்ளவர்கள்
இடுப்புச் சுற்றளவு கூடியவர்கள் (இடுப்பு சுற்றளவு 90 செ.மீற்றருக்கும் அதிகமான ஆண்கள் அல்லது 80 செ.மீற்றருக்கும் அதிகமான பெண்கள்)
உயர் குருதி அழுத்தம் (≥140/90 mmHg)
நீரிழிவு நோய் அறிகுறிகள் இருத்தல்
நெருங்கிய உறவினர் (தாய், தந்தை, உடன்பிறப்புகள் போன்றோர்) குறைந்த வயதில் இருதய நோய்க்கு ஆளாகியிருத்தல் (55 வயதிற்கு குறைந்த ஆண் உறவினர் அல்லது 65 வயதிற்கு குறைந்த பெண் உறவினர்)
நெருங்கிய உறவினருக்கு நீரிழிவு நோய் இருத்தல்
மரபணு மூலத்தால் ஏற்படும் குருதியில் கொழுப்பு நோய் இருத்தல்

நாட்பட்ட தொற்றா நோய்களைத் தடுப்பதற்கான நடவடிக்கைகள்

நாட்பட்ட தொற்றா நோய்களின் தாக்கத்தை குறைப்பதற்காக இலங்கை அரசு பல்வேறு நடவடிக்கைகளை எடுத்து வருகிறது. உடல் உழைப்பை ஊக்குவித்தல், புகையிலை மற்றும் மது பயன்பாட்டைக் கட்டுப்படுத்துதல் மற்றும் ஆரோக்கியமான உணவு பழக்கத்தை ஊக்குவித்தல் போன்ற பல்வேறு சுகாதார மேம்பாட்டுத் திட்டங்களை அரசு செயல்படுத்தி வருகிறது. மேலும், நாட்பட்ட தொற்றா நோய்களை ஆரம்பத்திலேயே கண்டறிந்து சிகிச்சை அளிப்பதற்கான வசதிகளையும் அரசு மேம்படுத்தி வருகிறது.

தனிநபர்களின் பங்கு

நாட்பட்ட தொற்றா நோய்களைத் தடுப்பதில் தனிநபர்களுக்கும் முக்கிய பங்கு உண்டு. ஆரோக்கியமான உணவுப் பழக்கத்தை பின்பற்றுதல், தவறாமல் உடற்பயிற்சி செய்தல், புகைபிடிப்பதை தவிர்த்தல், மது அருந்துவதைக் குறைத்தல் மற்றும் மன அழுத்தத்தை நிர்வகித்தல் போன்ற வாழ்க்கை முறை மாற்றங்களைச் செய்வதன் மூலம் நாட்பட்ட தொற்றா நோய்களின் அபாயத்தைக் குறைக்கலாம்.

முடிவுரை

இலங்கையில் நாட்பட்ட தொற்றா நோய்கள் ஒரு பாரிய சுகாதார சவாலாக உள்ளது. அரசு, சுகாதார நிறுவனங்கள் மற்றும் தனிநபர்கள் ஒன்றிணைந்து செயல்படுவதன் மூலம் நாட்பட்ட தொற்றா நோய்களின் தாக்கத்தை குறைக்க முடியும். ஆரோக்கியமான வாழ்க்கை முறையை பின்பற்றுவதன் மூலமும், நோய்களை முன்கூட்டியே கண்டறிந்து சிகிச்சை அளிப்பதன் மூலமும் நாட்பட்ட தொற்றா நோய்களிலிருந்து நம்மை பாதுகாத்துக் கொள்ள முடியும்.

(தொடரும்)